O Claustro de Profesorado do IES San Clemente alíñase cos principios de convivencia, dignidade e respecto polos dereitos humanos que fundamentan o noso proxecto educativo e cos principios reitores da LOMLOE (Lei Orgánica 3/2020), que salientan a educación en valores, a igualdade entre mulleres e homes, a prevención da violencia, así como a cultura de paz e os dereitos humanos como eixes transversais do noso sistema educativo. Como docentes, temos o deber de promover estes valores, esenciais para a adecuada formación do noso alumnado.
Consideramos que a defensa dos dereitos humanos é un piar esencial do noso labor docente. Por decencia e coherencia cos nosos valores, é o noso deber alzar a voz ante a terrible situación que está a vivir o pobo palestino, e condenamos os feitos que se reflicten no Informe do 16 de setembro de 2025 “Análise legal da conduta de Israel en Gaza conforme á Convención para a Prevención e a Sanción do Delito de Xenocidio“, elaborado pola Comisión Internacional Independente de Investigación sobre os territorios palestinos ocupados, baixo mandato das Nacións Unidas.
